[ad_1]
ସନ୍ଦୀପଙ୍କ ଶତକ, ରାଜେଶଙ୍କ ତୃତୀୟ ୧୦ ୱିକେଟ୍ ବେକାର
କଟକ: ରଣଜୀ ଟ୍ରଫି ଏଲିଟ୍ ଗ୍ରୁପ୍ ‘ଡି’ରେ ଓଡ଼ିଶା ପୁଣି ଥରେ କ୍ରିକେଟ୍ପ୍ରେମୀଙ୍କୁ ନିରାଶ କରିଛି। ଗତ ଶୁକ୍ରବାରଠାରୁ ‘ଡ୍ରିମ୍ସ’ ଖେଳପଡ଼ିଆରେ ଚାଲିଥିବା ରଣଜୀ ମୁକାବିଲାରେ ଜମ୍ମୁ କଶ୍ମୀର ରୋମାଞ୍ଚକ ଭାବେ ୨ ୱିକେଟ୍ରେ ଓଡ଼ିଶାକୁ ହରାଇଦେଇଛି। ଏପରିକି ସନ୍ଦୀପ ପଟ୍ଟନାୟକଙ୍କ ଲଢୁଆ ଶତକ (୧୮୭ ବଲ୍ରୁ ୧୦୦*) ଏବଂ ରାଜେଶ ମହାନ୍ତିଙ୍କ ୧୦ ୱିକେଟ୍ (୫/୬୪ ଓ ୫/୬୧) ସଫଳତା ବେକାର ଯାଇଛି। ଚଳିତ ରଣଜୀ ସିଜିନ୍ରେ ଓଡ଼ିଶାର ଏହା ତୃତୀୟ ମ୍ୟାଚ୍ରୁ ଦ୍ବିତୀୟ ପରାଜୟ। ପ୍ରଥମ ମ୍ୟାଚ୍ରେ ବରୋଦାଠୁ ଏହି ଦଳ ପରାସ୍ତ ହୋଇଥିଲା। ମଧ୍ୟପ୍ରଦେଶ ବିପକ୍ଷ ଅମୀମାଂସିତ ମ୍ୟାଚ୍ରୁ ପାଳି ଅଗ୍ରଣୀ ଭିତ୍ତିରେ ଓଡ଼ିଶା ୩ ପଏଣ୍ଟ ପାଇଛି। ଓଡ଼ିଶା ପରବର୍ତ୍ତୀ ମ୍ୟାଚ୍ ୨୬ ତାରିଖରୁ ସେଇ ଡ୍ରିମ୍ସ ପଡ଼ିଆରେ ହିମାଚଳପ୍ରଦେଶ ବିପକ୍ଷରେ ଖେଳିବ।
Sambad is now on WhatsApp
Join and get latest news updates delivered to you via WhatsApp
ମ୍ୟାଚ୍ର ଶେଷ ଦିନରେ ଓଡ଼ିଶାକୁ ଜିତିବା ପାଇଁ ୬ ୱିକେଟ୍ ଆବଶ୍ୟକ ଥିବା ବେଳେ ଭ୍ରମଣକାରୀଙ୍କୁ ୭୭ ରନ୍ ଦରକାର ହେଉଥିଲା। ମଧ୍ୟକ୍ରମ ବ୍ୟାଟର ଅବଦୁଲ ସମଦ ଓଡ଼ିଶା ବୋଲରଙ୍କୁ ସାହସିକତାର ସହ ସାମ୍ନା କରି ଏକାକୀ ଗୋଟିଏ ପଟରୁ ମ୍ୟାଚ୍ ଛଡ଼ାଇ ନେଇଥିଲେ। ରାଜେଶ ମହାନ୍ତି ଓ ସୁନୀଲ ରାଉଳ (୩/୩୯)ଙ୍କୁ ଛାଡ଼ିଦେଲେ ଅନ୍ୟମାନେ ପ୍ରଭାବହୀନ ଥିଲେ। ଜମ୍ମୁ କଶ୍ମୀର ୪୩.୪ ଓଭରରେ ବିଜୟ ଲକ୍ଷ୍ୟ ହାସଲ କରିଥିଲା। ଅବଦୁଲ ସମଦ ଶେଷ ପର୍ଯ୍ୟନ୍ତ ଅପରାଜିତ ରହି ୬୬* ରନ୍ କରିଥିଲେ।
ପୂର୍ବରୁ ଏହି ମ୍ୟାଚ୍ରେ ଜମ୍ମୁ-କଶ୍ମୀର ଟସ୍ ଜିତି ପ୍ରଥମେ କ୍ଷେତ୍ରରକ୍ଷଣ କରିଥିଲା। ଓଡ଼ିଶା ବିପର୍ଯ୍ୟୟର ସମ୍ମୁଖୀନ ହେବା ସହ ଗୋବିନ୍ଦ ପୋଦ୍ଦାରଙ୍କ ୫୫ ରନ୍ ସହାୟତାରେ ପ୍ରଥମ ପାଳିରେ ସମସ୍ତ ୱିକେଟ୍ ହରାଇ ୧୩୦ ରନ୍ କରିଥିଲା। ଜବାବରେ ଜମ୍ମୁ-କଶ୍ମୀର ପ୍ରଥମ ପାଳିରେ ୧୮୦ ରନ୍ କରି ୫୦ ରନ୍ର ଅଗ୍ରଣୀ ଲାଭ କରିଥିଲା। ଏହି ପାଳିରେ ରାଜେଶ ମହାନ୍ତି ୫ ୱିକେଟ୍ ସଫଳତା ପାଇଥିଲେ। ଦ୍ବିତୀୟ ପାଳିରେ ଓଡ଼ିଶା ପୁଣି ବିପର୍ଯ୍ୟୟ ଘେରରେ ପଡ଼ିଥିଲେ ମଧ୍ୟ ସନ୍ଦୀପ ପଟ୍ଟନାୟକଙ୍କ ଶତକୀୟ ପାଳି ସହାୟତାରେ ୧୯୮ ରନ୍ କରିପାରିଥିଲା। ଫଳରେ ଭ୍ରମଣକାରୀଙ୍କ ପାଇଁ ୧୪୯ରନ୍ ବିଜୟ ଲକ୍ଷ୍ୟ ଧାର୍ଯ୍ୟ କରାଯାଇଥିଲା।
ସଂକ୍ଷିପ୍ତ ସ୍କୋର: ଓଡ଼ିଶା ପ୍ରଥମ ପାଳି: ୧୩୦ (ଗୋବିନ୍ଦ ପୋଦ୍ଦାର-୫୫, ଶାନ୍ତନୁ ମିଶ୍ର-୨୮, ରୋହିତ ଶର୍ମା-୫/୧୨)। ଜମ୍ମୁ କଶ୍ମୀର ପ୍ରଥମ ପାଳି: ୧୮୦ (ଅାବିଦ୍ ମୁସ୍ତାକ-୫୦, ରାଜେଶ ମହାନ୍ତି-୫/୬୪, ସୁନିଲ ରାଉଳ-୩/୩୨, ପ୍ରୟାସ ସିଂହ-୧/୩୦)। ଓଡ଼ିଶା ଦ୍ବିତୀୟ ପାଳି: ୧୯୮ (ସନ୍ଦୀପ ପଟ୍ଟନାୟକ-୧୦୦*, ସୂର୍ଯ୍ୟକାନ୍ତ ପ୍ରଧାନ-୨୭, ଆକ୍ବିବ୍ ନବି-୪/୭୩, ଉମର ନଜିର ମିର୍-୩/୩୬, ରୋହିତ ଶର୍ମା-୨/୩୦, ଉମ୍ରାନ ମଲ୍ଲିକ-୧/୩୪)। ଜମ୍ମୁ କଶ୍ମୀର ଦ୍ବିତୀୟ ପାଳି: ୪୩.୪ ଓଭରରେ ୧୪୯/୮ (ଅବଦୁଲ ସମଦ-୬୬*, ଆକିବ ନବି-୨୮*, ଶୁଭମ ପୁନ୍ଦୀର-୧୮, ରାଜେଶ ମହାନ୍ତି-୫/୬୧, ସୁନିଲ ରାଉଳ-୩/୩୯)।
[ad_2]
