ମାଧୁରୀ ଦୀକ୍ଷିତ ମୁମ୍ବାଇର ଅନ୍ଧେରି ୱେଷ୍ଟରେ ଥିବା ନିଜ ଅଫିସ ଘରକୁ ଭଡ଼ାରେ ଦେଇଛନ୍ତି । ଚଳିତ ବର୍ଷ ବଲିଉଡର ଅନେକ ସେଲିବ୍ରିଟି ଲକ୍ଷ ଲକ୍ଷ ଟଙ୍କା ମୂଲ୍ୟରେ ନିଜର ଆପାର୍ଟମେଣ୍ଟ ରେଣ୍ଟରେ ଲଗାଇଛନ୍ତି । ଏବେ ଏଥିରେ ‘ଧକ୍-ଧକ୍ ଗାର୍ଲ’ଙ୍କ ନାମ ମଧ୍ୟ ଯୋଡ଼ି ହୋଇଛି । ବର୍ତ୍ତମାନ ବଲିଉଡ୍ ସେଲିବ୍ରିଟିମାନେ ବିଳାସପୂର୍ଣ୍ଣ ଘରଠାରୁ ଆରମ୍ଭ କରି ବ୍ୟବସାୟିକ ସମ୍ପତ୍ତି ପର୍ଯ୍ୟନ୍ତ ରିୟଲ ଇଷ୍ଟେଟ୍ ମାର୍କେଟରେ ଟଙ୍କା ରୋଜଗାର କରୁଛନ୍ତି ।
ମାଧୁରୀ ଅନ୍ଧେରି ୱେଷ୍ଟରେ ଥିବା ନିଜର ୧୫୯୪.୨୪ ବର୍ଗଫୁଟର ଅଫିସ୍ ସ୍ପେସକୁ ଏକ ଘରୋଇ କମ୍ପାନୀକୁ ଭଡ଼ା ଦେଇଛନ୍ତି । ନଭେମ୍ବର ୧୩ରେ ଏହି ଡିଲ୍ ଚୂଡାନ୍ତ ହୋଇଥିଲା । ଏଥିରେ ୯ ଲକ୍ଷ ଟଙ୍କାର ସିକ୍ୟୁରିଟି ଡିପୋଜିଟ୍ ଜମା ହୋଇଥିବା ସୂଚନା ରହିଛି । ପ୍ରଥମ ବର୍ଷ ପାଇଁ ମାସିକ ଭଡ଼ା ୩ ଲକ୍ଷ ଟଙ୍କା ଧାର୍ଯ୍ୟ କରାଯାଇଛି । କିନ୍ତୁ ଦ୍ୱିତୀୟ ବର୍ଷରୁ ଏହି ଭଡ଼ାକୁ ବଢ଼ାଇ ୩.୧୫ ଲକ୍ଷ ଟଙ୍କା କରାଯିବ ।
ମାଧୁରୀଙ୍କ ଛଡ଼ା ବଲିଉଡର ଅନେକ ସେଲିବ୍ରିଟି ରିୟଲ୍ ଇଷ୍ଟେଟରେ ଟଙ୍କା ବିନିଯୋଗ କରିଛନ୍ତି ଏବଂ ତଗଡ଼ା ରିଟର୍ନ ହାସଲ କରୁଛନ୍ତି । ମାଧୁରୀ ଦୀକ୍ଷିତ ବର୍ତ୍ତମାନ ଫିଲ୍ମରେ ବହୁତ କମ୍ ଦେଖାଯାଉଛନ୍ତି । ଏମିତିରେ ତାଙ୍କ ପାଇଁ ଏହା ଏକ ଭଲ ରୋଜଗାରର ମାଧ୍ୟମ ହେବ । ନିକଟରେ ଶାହିଦ କପୁର ମୁମ୍ବାଇର ୱର୍ଲିରେ ଥିବା ତାଙ୍କ ଆପାର୍ଟମେଣ୍ଟକୁ ମାସିକ ୨୦ ଲକ୍ଷ ଟଙ୍କାରେ ଭଡ଼ା ଦେଇଥିଲେ ।
କହି ରଖୁଛୁ, ୨୦୨୨ରେ ମାଧୁରୀ ଦୀକ୍ଷିତ ମୁମ୍ବାଇର ଲୋୟର ପରେଲରେ ଏକ ବିଳାସପୂର୍ଣ୍ଣ ଆପାର୍ଟମେଣ୍ଟ କିଣିଥିଲେ । ଏହି ସମ୍ପତ୍ତିକୁ କିଣିବା ପାଇଁ ଅଭିନେତ୍ରୀ ୪୮ କୋଟି ଟଙ୍କା ଖର୍ଚ୍ଚ କରିଥିବା ଜଣାଯାଇଛି । ୫୩ତମ ମହଲାରେ ଥିବା ଏହି ଆପାର୍ଟମେଣ୍ଟ ୫,୩୮୪ ବର୍ଗଫୁଟରେ ବିସ୍ତାର ହୋଇଛି । ଏଠାରୁ ମାୟାନଗରୀର ଦୃଶ୍ୟ ଅତି ସୁନ୍ଦର ଭାବରେ ଦେଖାଯାଉଛି । ଏଥି ସହିତ ଅଭିନେତ୍ରୀ ସାତୋଟି କାର୍ ପାର୍କିଂ ସ୍ଥାନ ମଧ୍ୟ ରିଜର୍ଭ କରିଛନ୍ତି ।
