ଘରେ ପଶି ସ୍ବାମୀ ଆଗରେ ସ୍ତ୍ରୀକୁ ଗଣଦୁଷ୍କର୍ମ କଲେ ଦୁର୍ବୃତ୍ତ, ସହିନପାରି ଜୀବନ ହାରିଲେ ଦମ୍ପତି – bajravana

ଲ‌କ୍ଷ୍ନୌ: ଘରେ ପଶି ସ୍ବାମୀ ଆଗରେ ସ୍ତ୍ରୀକୁ ଗଣଦୁଷ୍କର୍ମ କଲେ ଦୁର୍ବୃତ୍ତ। ସହିନପାରି ଜୀବନ ହାରିଲେ ଦମ୍ପତି। ଉତ୍ତରପ୍ରଦେଶର ବସ୍ତି ଜିଲ୍ଲାରେ ଘଟିଛି ଏଭଳି ଦୁଃଖଦାୟକ ଘଟଣା। ଅଭିଯୁକ୍ତମାନେ ସ୍ୱାମୀଙ୍କ ଆଗରେ ପତ୍ନୀଙ୍କ ସହ ଗଣଦୁଷ୍କର୍ମ କରିଥିଲେ। ଏଭଳି ଅପରାଧ କରି ୨ଜଣ ଅଭିଯୁକ୍ତ ଫେରାର ହେବା ପରେ ଜୀବନ ହାରିଥିଲେ ଦମ୍ପତି। ଏବେ ଘଟଣାରେ ସାମିଲ ୨ଅଭିଯୁକ୍ତଙ୍କୁ ଗିରଫ କରି ତଦନ୍ତ କରୁଛି ପୁଲିସ।

ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଏହି ଘଟଣା ବସ୍ତି ଜିଲ୍ଲାର ରୁଦ୍ଧୌଲି ଗ୍ରାମରେ ଘଟିଥିଲା। ସେପ୍ଟେମ୍ବର ୨୧ରେ, ଏକ ଦମ୍ପତି ବିଷ ଖାଇଦେଇଥିବା ସାମ୍ନାକୁ ଆସିଥିଲା। ଏବିଷୟରେ ଜାଣି ପଡୋଶୀ ଦମ୍ପତିଙ୍କୁ ସ୍ଥାନୀୟ ଡାକ୍ତରଖାନା ନେଇଥିଲେ। ସେଠାରୁ ସେମାନଙ୍କୁ ବସ୍ତି ଡାକ୍ତରଖାନାକୁ ପଠାଯାଇଥିଲା। ଚିକିତ୍ସା ସମୟରେ ସ୍ୱାମୀଙ୍କର ମୃତ୍ୟୁ ହୋଇଥିବାବେଳେ ମହିଳାଙ୍କୁ ଗୋରଖପୁରର ବିଆରଡି ମେଡିକାଲ କଲେଜକୁ ଚିକିତ୍ସା ପାଇଁ ପଠାଯାଇଥିଲା। ହେଲେ ଶୁକ୍ରବାର ଦିନ ଚିକିତ୍ସା ସମୟରେ ମହିଳାଙ୍କର ମଧ୍ୟ ପ୍ରାଣବ‌ାୟୁ ଉଡ଼ିଯାଇଥିଲା।

ଦମ୍ପତିଙ୍କ ମୃତ୍ୟୁ ପରେ ତାଙ୍କ ପରିବାର ଲୋକେ ଗଣଦୁଷ୍କର୍ମ ହୋଇଥିବା ନେଇ ପୁଲିସରେ ଅଭିଯୋଗ କରିଥିଲେ। ବିଷ ଖାଇବା ପୂର୍ବରୁ ମହିଳାଜଣକ ଗଣଦୁଷ୍କର୍ମର ଶିକାର ହୋଇଥିଲେ। ସ୍ବାମୀ ହୋଇ କିଛି କରିନପାରିବାରୁ ଭାଙ୍ଗିପଡ଼ିଥିଲେ ମୃତ ଯୁବକ। ଏହା ପରେ ଅଭିଯୁକ୍ତମା‌‌ନେ ଫେରାର ହେବା ଦେଖି ଦୁହେଁ ଜୀବନ ହାରିବାକୁ ନିଷ୍ପତ୍ତି ନେଇଥିଲେ।

ବସ୍ତି ଏସପି ଗୋପାଳ କୃଷ୍ଣ ଚୌଧୁରୀ କହିଛନ୍ତି ଯେ ଘଟଣାର ତଦନ୍ତ କରାଯାଇ ଉଭୟ ଅଭିଯୁକ୍ତଙ୍କୁ ଗିରଫ କରାଯାଇଛି।