ବେଙ୍ଗାଳୁରୁ : ବନ୍ଧା ହେଲେ ଅତୁଲଙ୍କ ସ୍ତ୍ରୀ ନିକିତା । ନିକିତାଙ୍କ ସହ ତାଙ୍କ ମାଆ ଏବଂ ଭାଇ ମଧ୍ୟ ଗିରଫ ହୋଇଛନ୍ତି । ଅତୁଲ ସୁବାସ ଜୀବନ ହାରିବା ମାମଲାରେ ତିନି ଜଣଙ୍କୁ ଗିରଫ କରିଛି ପୋଲିସ । ନିକିତାଙ୍କୁ ଗୁରୁଗ୍ରାମ ପୋଲିସ ଗିରଫ କରିଥିବା ବେଳେ ତାଙ୍କ ମାଆ ଏବଂ ଭାଇଙ୍କୁ ଗିରଫ କରିଛି ପ୍ରୟାଗରାଜ ପୋଲିସ୍ । ଗିରଫ ପରେ ସମସ୍ତଙ୍କୁ କୋର୍ଟରେ ହାଜର କରାଯାଇଛି ।
ଗତ ୯ ତାରିଖରେ ଜୀବନ ହାରିଥିଲେ ବେଙ୍ଗାଳୁରୁ ଏଆଇ ଇଞ୍ଜିନିୟର ଅତୁଲ ସୁବାଷ । ମୃତ୍ୟୁ ପୂର୍ବରୁ ଦେଢ ଘଣ୍ଟାର ଭିଡିଓ ଏବଂ ୨୪ ପୃଷ୍ଠାର ସୁଇସାଇଡ ନୋଟ ଛାଡି ଯାଇଥିଲେ । ଯେଉଁଥିରେ ସେ ନିଜ ଜୀବନ ହାରିବାର କାରଣ ଲେଖିଯାଇଥିଲେ । କିପରି ତାଙ୍କୁ ହଇରାଣ କରାଯାଉଥିବା ସମସ୍ତ ଘଟଣା ସେ ଗୋଟି ଗୋଟି କର ବର୍ଣ୍ଣନା କରିଥିଲେ । ଅତୁଲ ସୁବାସଙ୍କ ଘର ଉତ୍ତରପ୍ରଦେଶର ଜୌନପୁରରେ । ପତ୍ନୀଙ୍କଠାରୁ ଛାଡପତ୍ର ପାଇଁ ମାମଲା ଚାଲିଥିଲା । ମାମଲାର ଶୁଣାଣି ପାଇଁ ପ୍ରାୟ ୪୦ ଥର ବେଙ୍ଗଲୁରୁରୁ ଜୌନପୁର ଯିବାକୁ ପଡିଥିଲା ଅତୁଲଙ୍କୁ । ତଥାପି ନ୍ୟାୟ ମିଳିନଥିଲା । ପ୍ରଥମେ ମାମଲା ସମାଧାନ ପାଇଁ ନିକିତାଙ୍କ ପରିବାର ୧ କୋଟି ଟଙ୍କା ମାଗିଥିଲେ ମଧ୍ୟ ପରେ ୩ କୋଟି ଦାବି କରିଥିଲେ । ପରିବାର ଅଦାଲତର ବିଚାରପତିଙ୍କ ବିରୋଧରେ ମଧ୍ୟ ଅତୁଲ ନିଜ ଚିଠିରେ ଆଣିଛନ୍ତି ସଙ୍ଗୀନ ଅଭିଯୋଗ । ଏପରିକି ପୁଅ ସହ ଦେଖା କରାଇବା ପାଇଁ ସ୍ତ୍ରୀ ନିକିତା ୩୦ ଲକ୍ଷ ଟଙ୍କା ମାଗିଥିବା ଅଭିଯୋଗ ହୋଇଛି । ଅତୁଲଙ୍କ ଜୀବନ ହାରିବା ମାମଲାରେ ୪ ଜଣଙ୍କ ନାଁରେ ଦାଏର ଏତଲା ହୋଇଥିଲା । ଅତୁଲଙ୍କ ପତ୍ନୀ, ଶାଶୁ, ଶଳା ଓ ମାନସିକ ନିର୍ଯାତନା ଅଭିଯୋଗରେ ବିଚାରପତିଙ୍କ ନାଁରେ ବି କର୍ଣ୍ଣାଟକରେ ଏଫଆଇର ରୁଜୁ ହୋଇଛି ।
