ରାସ୍ତା ଉପରୁ ଟାଣିନେଇ ନାବାଳିକାକୁ ଦୁଷ୍କର୍ମ ଉଦ୍ୟମ: ଯୁବକକୁ କାବୁ କରି ପୁଲିସ ଜିମା ଦେଲେ ପଥଚାରୀ – bajravana

ରାଜନଗର: ରାଜନଗର-ପଟ୍ଟାମୁଣ୍ଡାଇ ରାସ୍ତାର ସାନବଡ଼ଗୋପାଳପୁର ନିକଟରେ ରାସ୍ତା ଉପରୁ ଟାଣିନେଇ ଜଣେ ନାବାଳିକାଙ୍କୁ ଦୁଷ୍କର୍ମ ଉଦ୍ୟମ କରାଯାଇଛି। ପାଟି ଶୁଣି ଲୋକେ ନାବାଳିକାଙ୍କୁ ଉଦ୍ଧାର କରିବା ସହ ଅଭିଯୁକ୍ତକୁ କାବୁ କରି ପୁଲିସ ଜିମା ଦେଇଛନ୍ତି। ସୂଚନା ମୁତାବକ, ଆଜି ରାତି ପ୍ରାୟ ୮ଟା ସମୟରେ ରାଜନଗର ଥାନା ଅଞ୍ଚଳର ଜଣେ ୧୭ ବର୍ଷୀୟା ନାବାଳିକା ରାଜନଗର ବଜାରରୁ ସାଇକଲ ଯୋଗେ ଘରକୁ ଫେରୁଥିଲେ। ସାନବଡ଼ଗୋପାଳପୁର ନିକଟ ମଦ ଦୋକାନ ନିକଟରୁ ରାଜନଗର ଥାନା ଅନ୍ତର୍ଗତ ଡିଆପାରି ଗାଁର ବାପୁଜି ସେଠୀ(୨୧) ସାଇକଲରେ ନାବାଳିକାଙ୍କ ପିଛା କରିଥିଲା। ରାଜନଗର-ପଟ୍ଟାମୁଣ୍ଡାଇ ରାସ୍ତାରେ ଥିବା ଠିପି ଖୋଲା ମଦ ଦୋକାନ ପୂର୍ବରୁ ନିଛାଟିଆ ସ୍ଥାନ ଦେଖି ବାପୁଜି ନାବାଳିକାଙ୍କ ଚୁଟିକୁ ଟାଣି ଦେଇଥିଲା। ଫଳରେ ନାବାଳିକା ରାସ୍ତା ଉପରେ ପଡ଼ିଯିବା ପରେ ତାଙ୍କ ଗୋଡ଼କୁ ଧରି ଘୋଷାଡ଼ିଘୋଷାଡ଼ି ରାସ୍ତା କଡ଼ରେ ଥିବା ବୁଦା ମଧ୍ୟକୁ ନେଇଯାଇଥିଲା।

ନାବାଳିକାଙ୍କ ଚିତ୍କାର ଶୁଣି ନିକଟରେ ଥିବା ବ୍ୟବସାୟୀ ଓ ପଥଚାରୀ ସେଠାରେ ପହଞ୍ଚି ତାଙ୍କୁ ଉଦ୍ଧାର କରିବା ସହ ଯୁବକଙ୍କୁ କାବୁ କରି ରାଜନଗର ପୁଲିସ ଜିମା ଦେଇଛନ୍ତି। ଏହି ଘଟଣାରେ ନାବାଳିକା ଜଣକ ଆହତ ହୋଇଛନ୍ତି। ଏପରିକି ପାଟି କରିବାରୁ ଯୁବକ ଜଣକ ତାଙ୍କୁ ବାରମ୍ବାର ଚାପୁଡ଼ା ମାରିଥିବା ଜଣାପଡ଼ିଛି। ଏହି ଘଟଣାକୁ ନେଇ ରାଜନଗର ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି। ପୀଡ଼ିତା ନାବାଳିକାଙ୍କୁ ରାଜନଗର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସା କରାଯାଇଛି। ପୀଡ଼ିତାଙ୍କ ପରିବାର ଲୋକେ ଏ ନେଇ ରାଜନଗର ଥାନାରେ ଲିଖିତ ଅଭିଯୋଗ କରିଛନ୍ତି।