[ad_1]
ଚନ୍ଦ୍ରଶେଖରପୁର: ନିଳାଦ୍ରୀବିହାର ସେକ୍ଟର-୩ ଅଞ୍ଚଳରେ ଜଣେ ଗର୍ଭବତୀ ମହିଳାଙ୍କୁ ଆକ୍ରମଣ କରିଥିବା ଅଭିଯୋଗରେ ଆଜି ଚନ୍ଦ୍ରଶେଖରପୁର ଥାନା ପୁଲିସ ଅଭିଯୁକ୍ତ ବାପା ଓ ପୁଅଙ୍କୁ ଗିରଫକରି କୋର୍ଟ ଚାଲାଣ କରିଛି। ଅଭିଯୋଗ ଅନୁଯାୟୀ, ବାପା ନବକିଶୋର ଚୌଧୁରୀ (୬୮) ଓ ପୁଅ ନିରୂପ ସୁନ୍ଦର ଚୌଧୁରୀ (୨୯) ସେମାନଙ୍କର ଜଣେ ପଡ଼ୋଶୀ ମହିଳାଙ୍କୁ ପ୍ରାଣାନ୍ତକ ଆକ୍ରମଣ କରିଥିଲେ। ଏ ନେଇ ମହିଳା ଜଣକ ଥାନାରେ ଅଭିଯୋଗ କରିବାରୁ ପୁଲିସ ଦୁଇ ଅଭିଯୁକ୍ତଙ୍କୁ ଗିରଫକରି ଆଜି କୋର୍ଟ ଚାଲାଣ କରିଛି।
ପୁଲିସର ସୂଚନା ଅନୁଯାୟୀ, ଉଭୟଙ୍କ ଘର ମଝିରେ ଗୋଟିଏ କାନ୍ଥ ରହିଛି। ସେମାନଙ୍କ ମଧ୍ୟରେ ପୂର୍ବରୁ ଜମି ବିବାଦ ଲାଗି ରହିଥିଲା। ଯାହାନେଇ ବାରମ୍ବାର ଝଗଡ଼ା ହେଉଥିଲା। ଆଜି ସକାଳେ ଅଭିଯୋଗକାରିଣୀ ଗର୍ଭବତୀ ମହିଳା ଜଣକ କାନ୍ଥରେ ଏକ ଲୁହା କଣ୍ଟା ବାଡ଼ାଉଥିଲେ। ତାହାକୁ ଅଭିଯୁକ୍ତ ବାପା ଓ ପୁଅ ବିରୋଧ କରିଥିଲେ। ଏନେଇ ଉଭୟ ପକ୍ଷଙ୍କ ମଧ୍ୟରେ ବଚସା ହେବାରୁ ମହିଳା ଜଣଙ୍କୁ ବାପା ଓ ପୁଅ ମାଡ଼ ମାରିଥିଲେ। ଫଳରେ ଗର୍ଭବତୀ ମହିଳାଙ୍କ ପେଟରେ ଆଘାତ ଲାଗିଛି ବୋଲି କହି ସେ ଯନ୍ତ୍ରଣାରେ ଚିତ୍କାର କରିଥିଲେ। ଏହାପରେ ତାଙ୍କ ପରିବାର ଲୋକ ଘଟଣାସ୍ଥଳକୁ ଆସି ପିସିଆରକୁ ସୂଚନା ଦେଇଥିଲେ। ପୁଲିସ ଘଟଣାସ୍ଥଳରେ ପହଞ୍ଚି ଉଭୟ ଅଭିଯୁକ୍ତଙ୍କୁ ଥାନାକୁ ନେବା ସହିତ ଗର୍ଭବତୀଙ୍କୁ ଚିକିତ୍ସା ପାଇଁ ନିକଟସ୍ଥ ଏକ ହସ୍ପିଟାଲକୁ ନେଇଥିଲା।
[ad_2]
