[ad_1]
ରାଉରକେଲା: ଦକ୍ଷିଣପୂର୍ବ ଏସୀୟ ଦେଶ ଲାଓସ୍ରେ ନିଯୁକ୍ତିଦାତା ଦ୍ବାରା ବନ୍ଧକ ଓଡ଼ିଶାର ୩୫ ଶ୍ରମିକଙ୍କୁ ଉଦ୍ଧାର କରିବାକୁ ମୁଖ୍ୟମନ୍ତ୍ରୀ ଶ୍ରମ ବିଭାଗକୁ ନିର୍ଦ୍ଦେଶ ଦେଇଛନ୍ତି। ରାଜ୍ୟ ଶ୍ରମମନ୍ତ୍ରୀ ସାରଦା ନାୟକ କହିଛନ୍ତି, ବନ୍ଧକ ଥିବା ସମସ୍ତ ଶ୍ରମିକ ଓଡ଼ିଶାର ୪ଟି ଜିଲ୍ଲାର। ସମସ୍ତଙ୍କୁ ଚିହ୍ନଟ କରାଯାଇଛି। ସେମାନଙ୍କୁ ଉଦ୍ଧାର କରି ଓଡ଼ିଶା ଫେରାଇ ଆଣିବାକୁ ସବୁ ପ୍ରକ୍ରିୟା ସରିଛି। ଖୁବ୍ ଶୀଘ୍ର ସମସ୍ତ ଶ୍ରମିକଙ୍କୁ ସୁରକ୍ଷିତ ଭାବେ ଓଡ଼ିଶା ଫେରାଇ ଅଣାଯିବ। ଏଥିପାଇଁ ଶ୍ରମ ବିଭାଗ ସେଠାକାର ରାଷ୍ଟ୍ରଦୂତଙ୍କ ସହ ଯୋଗାଯୋଗରେ ରହିଛନ୍ତି।
ଉଲ୍ଲେଖଯୋଗ୍ୟ, ୩୫ ଓଡ଼ିଆ ଶ୍ରମିକ ଲାଓସରେ ସେମାନଙ୍କ ନିଯୁକ୍ତିଦାତା ଦ୍ୱାରା ବନ୍ଦୀ ହୋଇଥିବାର ଅଭିଯୋଗ ହୋଇଥିଲା। ଏହି ଦୁଃଖଦ ପରିସ୍ଥିତିର ଜବାବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସେମାନଙ୍କ ନିରାପଦରେ ସ୍ବଦେଶ ପ୍ରତ୍ୟାବର୍ତ୍ତନ ସୁନିଶ୍ଚିତ କରିବାକୁ ଅଧିକାରୀମାନଙ୍କୁ ଶୁକ୍ରବାର ନିର୍ଦ୍ଦେଶ ଦେଇଥିଲେ। ଶ୍ରମିକମାନେ ଏକ ଭିଡିଓ ବାର୍ତ୍ତା ମାଧ୍ୟମରେ ସରକାରଙ୍କୁ ଅନୁରୋଧ କରିଥିଲେ। କହିଥିଲେ, ସେମାନେ କାମ କରୁଥିବା ପ୍ଲାଇଡ୍ କମ୍ପାନି ମାସେରୁ ଅଧିକ ହେଲା କାମ ବନ୍ଦ କରିଦେଇଛି। କାର୍ଯ୍ୟ ବନ୍ଦ ହେବା ପରେ ମଧ୍ୟ ଶ୍ରମିକମାନଙ୍କୁ ଘରକୁ ଯିବାକୁ ଅନୁମତି ଦିଆଯାଉ ନାହିଁ କିମ୍ବା ବେତନ ମଧ୍ୟ ମିଳି ନାହିଁ। କମ୍ପାନି ସେମାନଙ୍କ ପାସପୋର୍ଟ ଜବତ କରି ରଖିଥିବା ଶ୍ରମିକମାନେ ଅଭିଯୋଗ କରିଥିଲେ। ଏହି ଗୁରୁତର ପରିସ୍ଥିତି ସମ୍ପର୍କରେ ସୂଚନା ପାଇବା ପରେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଓଡିଶା ସରକାର ତ୍ୱରିତ କାର୍ଯ୍ୟ କରିଥିଲେ। ଲାଓସରେ ଥିବା ଭାରତୀୟ ଦୂତାବାସ ସହ ରାଜ୍ୟର ଶ୍ରମ କମିସନର ଆଲୋଚନା କରିଛନ୍ତି ଓ ଶ୍ରମିକଙ୍କ ଭାରତକୁ ନିରାପଦ ପ୍ରତ୍ୟାବର୍ତ୍ତନ ପାଇଁ ସମସ୍ତ ପଦକ୍ଷେପ ଗ୍ରହଣ କରାଯିବ ବୋଲି ଦୂତାବାସ କର୍ତ୍ତୃପକ୍ଷ ନିଶ୍ଚିତ କରିଛନ୍ତି। ଅଟକ ଥିବା ଶ୍ରମିକମାନେ ନିଜ ପରିବାର ଓ ଗାଁ’ ଲୋକଙ୍କୁ ଭିଡିଓ ବାର୍ତ୍ତା ମାଧ୍ୟମରେ ସେମାନଙ୍କର ଅସୁବିଧା ଜଣାଇଥିଲେ। ଏହାପରେ ଚିନ୍ତିତ ସ୍ଥାନୀୟ ଲୋକେ ସ୍ଥାନୀୟ ବିଧାୟକଙ୍କୁ ଜଣାଇଥିଲେ ଓ ଖବର ରାଜ୍ୟ ସରକାରଙ୍କ ଦୃଷ୍ଟିକୁ ଆସିଥିଲା। ଭିଡିଓରେ ବନ୍ଦୀ ଶ୍ରମିକମାନଙ୍କ ମଧ୍ୟରୁ ସରୋଜ ପଲାଇ ସେମାନଙ୍କ ଦୟନୀୟ ସ୍ଥିତି ସଂପର୍କରେ ସୂଚନା ଦେଇଥିଲେ।
[ad_2]
