ହାତରେ କୌଣସି ଅସ୍ତ୍ର ନ ଥିଲେ ବି ଆତଙ୍କବାଦୀଙ୍କୁ ଅଟକାଇଥିଲେ ‘ଅଶୋକଚକ୍ର’ ପାଇଥିବା ଦେଶର ପ୍ରଥମ ମହିଳା ପୁଲିସ୍
ନୂଆଦିଲ୍ଲୀ: ଆତଙ୍କବାଦୀଙ୍କୁ ପାର୍ଲାମେଣ୍ଟ ଭିତରେ ପ୍ରବେଶ କରିବାରୁ ରୋକିଥିବା ସୁରକ୍ଷା କର୍ମୀ ଜଣକ କିଏ? ସେ ହେଉଛନ୍ତି ସିଆର୍ପିଏଫ୍ର ଜଣେ ମହିଳା କନଷ୍ଟେବଲ୍ । ନାଁ ତାଙ୍କର କମଲେଶ କୁମାରୀ। ସିଆର୍ପିଏଫ୍ରେ ଜଣେ କନ୍ଷ୍ଟେବଲ୍ ଭାବେ କାର୍ଯ୍ୟ କରୁଥିବା କମଲେଶ କୁମାରୀଙ୍କର ସେଦିନ ପାର୍ଲାମେଣ୍ଟ ଗେଟରେ ଡ୍ୟୁଟି ଥିଲା। ହାତରେ ଥିଲା କେବଳ ଗେଂଟିଏ ଓ୍ଵାକିଟକି। କାରଣ ସେତେବେଳେ ସିଆରପିଏଫ୍ ମହିଳା କର୍ମୀଙ୍କୁ ବନ୍ଧୁକ ଦିଆଯାଉ ନ ଥିଲା।
୨୦୦୧ ମସିହା ଡିସେମ୍ବର ୧୩ । ଲାଲବତୀ ଲାଗିଥିବା ଏକ ଧଳା ଆମ୍ବାସଡର କାର ପାର୍ଲାମେଣ୍ଟ ଭବନ ଗେଟ୍ରେ ପଶିଲା। ଗୃହ ମନ୍ତ୍ରାଳୟ ବୋର୍ଡ ବି ଗାଡ଼ିରେ ଲାଗିଥିଲା। ଅଟକାଇବାର କିଛି କାରଣ ନଥିଲା। କିନ୍ତୁ ଗାଡିଟି ପାର୍ଲାମେଣ୍ଟ ଭବନ ହତା ଭିତରେ ପଶିବା ପରେ ଅସ୍ୱାଭାବିକ ଭାବେ ଗତି ବଢ଼ାଇଲା। କମଲେଶ କୁମାରୀଙ୍କ ସନ୍ଦେହ ହେଲା। ତାଙ୍କ ହାତରେ ଗାଡ଼ିକୁ ଅଟକାଇବା ଲାଗି କିଛି ଅସ୍ତ୍ର ନ ଥିଲା। ସେ ଓ୍ଵାକିଟକିରେ କଣ୍ଟ୍ରୋଲ୍ ରୁମ୍କୁ ଜଣାଇବା ସହ ଅନ୍ୟ ଅସ୍ତ୍ରଧାରୀ ସୁରକ୍ଷା କର୍ମୀଙ୍କୁ ସାବଧାନ କରିବାକୁ ଚିତ୍କାର କରି ସେ କାର ପଛେ ପଛେ ଦୌଡିଲେ।
