ଖଲିସ୍ତାନୀଙ୍କଠାରୁ ଅଲଗା ହୋଇ ଅଖଣ୍ଡ ଭାରତକୁ ସମର୍ଥନ କର; ଶିଖମାନଙ୍କୁ କଙ୍ଗନାଙ୍କ ପରାମର୍ଶ – bajravana

ମୁମ୍ବାଇ: ଖଲିସ୍ତାନୀଙ୍କଠାରୁ ଅଲଗା ହୋଇ ଅଖଣ୍ଡ ଭାରତକୁ ସମର୍ଥନ କର। ଶିଖମାନଙ୍କୁ ପରାମର୍ଶ ଦେଲେ କଙ୍ଗନା। ଏବେ ଖଲିସ୍ତାନୀମାନଙ୍କ ପାଇଁ ଭାରତ ଏବଂ କାନାଡା ମଧ୍ୟରେ ସମ୍ପର୍କ ଖରାପ ହେବାରେ ଲାଗିଛି। ଗୋଟିଏ ପଟେ ଖଲିସ୍ତାନୀ ଆତଙ୍କବାଦୀ ହରଦୀପ ସିଂହ ନିଜାରର ହତ୍ୟାରେ ଭାରତର ହାତ ଥିବା କାନାଡାର ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଅଭିଯୋଗ କରିଛନ୍ତି। ଅନ୍ୟପକ୍ଷରେ, ଭାରତରୁ କାନାଡା ପାଇଁ ଭିସା ସେବା ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ସ୍ଥଗିତ ରହିଛି। ଏହି ସମୟରେ ବଲିଉଡ ଅଭିନେତ୍ରୀ କଙ୍ଗନା ରାନାୱତଙ୍କ ଏକ ପୋଷ୍ଟ ଲାଇମ ଲାଇଟକୁ ଆସିଛି। ଏହି ପୋଷ୍ଟରେ ସେ ‘ପଞ୍ଜାବ’ର ଅବସ୍ଥା ବିଷୟରେ କହିଛନ୍ତି। ଏହା ସହିତ ଶିଖ ସମ୍ପ୍ରଦାୟକୁ ମଧ୍ୟ ଏକ ପରାମର୍ଶ ଦେଇଛନ୍ତି।

କଙ୍ଗନା ରାନାୱତ ନିଜ ଇନଷ୍ଟାଗ୍ରାମ ଆକାଉଣ୍ଟରେ ଏକ ପୋଷ୍ଟ ସେୟାର କରିଥିବା ଦେଖାଯାଇଛି। ଏହି ପୋଷ୍ଟରେ ସେ ଲେଖିଛନ୍ତି, ‘ଏହା ହେଉଛି ପଞ୍ଜାବର ଅବସ୍ଥା। ଯେତେବେଳେ ମୁଁ ଖଲିସ୍ତାନୀମାନଙ୍କୁ ବିରୋଧ କରିଥିଲି, ସେମାନେ ଶିଖ ସମ୍ପ୍ରଦାୟକୁ ବୁଝାଇଦେଇଥିଲେ ଯେ ମୁଁ ସେମାନଙ୍କ ସମଗ୍ର ସମ୍ପ୍ରଦାୟକୁ ବିରୋଧ କରୁଛି। ସେଥିପାଇଁ ଆଜି ବି ପଞ୍ଜାବରେ ମୋର ଚଳଚ୍ଚିତ୍ର ପ୍ରଦର୍ଶନ ଉପରେ ପ୍ରତିବନ୍ଧକ ଲଗାଯାଇଛି। ସେମାନଙ୍କୁ ଉତ୍ତେଜିତ କରିବା ଏବଂ ଭୁଲ ପଥରେ ପଠାଇବା ସହଜ ଅଟେ।’

ଆଉ ଏକ ଇନଷ୍ଟା‌ ଷ୍ଟୋରୀରେ ସେ ଲେଖିଛନ୍ତି, ‘ଶିଖ୍ ସମ୍ପ୍ରଦାୟଗୁଡିକୁ ଖଲିସ୍ତାନୀମାନଙ୍କଠାରୁ ନିଜକୁ ଅଲଗା କରିବା ଉଚିତ୍ ଏବଂ ଅଧିକାଂଶ ଶିଖ୍ ଅଖଣ୍ଡ ଭାରତର ସମର୍ଥନରେ ଆସିବା ଉଚିତ୍। ଖଲିସ୍ତାନୀ ଆତଙ୍କବାଦ ଯୋଗୁଁ ସମଗ୍ର ସମ୍ପ୍ରଦାୟର ଭାବମୂର୍ତ୍ତି ଖରାପ ହେଉଛି। ଜୟ ହିନ୍ଦ। ‘