ସୋର: ଦୋକାନ ଖୋଲୁଥିଲେ, ଲୁଟିନେଲେ । ସୁନା ଦୋକାନୀଙ୍କ ନିକଟରୁ ଲୁଟ୍ । ଏତେଦିନ ଧରି ଦୋକାନ ବନ୍ଦ ରହିଥିଲା ଭାବିଥିଲେ ଆଜି ଦୋକାନ ଖୋଲିବେ ଆଉ ଦୋକାନ ଖୋଲିବା ପରେ ଯାହା କିଛି ବ୍ୟବସାୟ ହେବ ସେଥିରୁ ଦୁଇ ପଇସା ଲାଭ ପାଇବେ । ସେଥିରେ ଚଳିବ ତାଙ୍କ ଦୁଃଖ ସୁଖର ସଂସାର । କିନ୍ତୁ ଏସବୁ ପୂର୍ବରୁ ଆଖି ସାମ୍ନାରେ ଘଟିଗଲା ଏମିତି କିଛି । ଚାହିଁ ରହିବା ଛଡ଼ା କିଛି କରିପାରିଲେନି .ଦୋକାନୀ । ଏଭଳି ଅଭାବନୀୟ କାଣ୍ଡ ଘଟିଛି ବାଲେଶ୍ୱର ଜିଲ୍ଲା ଖଇରା ଥାନା ଅନ୍ତର୍ଗତ ଡୁଙ୍ଗୁରା ବଜାରରେ ।
ଲୁଟର ଶିକାର ହୋଇଛନ୍ତି ସାନଜୟପୁର ଗାଁର ଗଣେଷ ସାହୁ। ସେ ଡୁଙ୍ଗୁରା ବଜାରରେ ୭ ବର୍ଷ ହେବ ଦୋକାନ କରିଛନ୍ତି । ଗତ ୪ ଦିନ ଧରି ଗଣେଷଙ୍କ ଦୋକାନ ବନ୍ଦ ରହିଥିଲା । ଆଜି ସକାଳେ ଦୋକାନ ସଟର ଖୋଲିବା ସମୟରେ ଏମିତି ସେ ଲୁଟର ଶିକାର ହୋଇଛନ୍ତି । ୨ ଜଣ ଦୁର୍ବୃତ୍ତ ସୁନା ବ୍ୟାଗ ଛଡାଇ ନେଇ ଫେରାର ହୋଇଯାଇଥିଲେ ।
ତେବେ ଦୋକାନୀ ଜଣକ ସଟର ଖୋଲିବା ସମୟରେ ହାତରେ ଥିବା ବ୍ୟାଗଟିକୁ ପାଖରେ ଥିବା ଷ୍ଟୁଲ ଉପରେ ରଖିଥିଲେ l ସେହି ସମୟରେ ୨ ଜଣ ଚୋର କୌଶଳକ୍ରମେ ବ୍ୟାଗଟିକୁ ନେଇ ଏକ ଆପାଚି ଗାଡିରେ ଫେରାର ହୋଇଗଲେ l ପାଖରେ ଥିବା ଦୋକାନୀ ଲୁଟେରାଙ୍କ ପଛରେ ଗୋଡ଼ାଇଥିଲେ ମଧ୍ୟ ପାଇପାରିନଥିଲେ l ତେବେ ଦୋକାନୀଙ୍କ ବ୍ୟାଗରେ ସୁନା, ରୁପା ମିଶି ପାଖାପାଖି ଦେଢ଼ଲକ୍ଷ ଟଙ୍କାର ସୁନା ଗହଣା ରହିଥିଲା ଯାହାକୁ ନେଇ ଫେରାର ହୋଇଯାଇଛନ୍ତି l
ଏହି ଲୁଟ୍ ସମୟର ଦୃଶ୍ୟ ସିସିଟିଭିରେ କଏଦ ହୋଇଛି । ଯେଉଁଥିରେ ଆପଣ ସ୍ପଷ୍ଟ ଭାବେ ଦେଖିପାରୁଥିବେ ଯେ କିଭଳି ଲୁଟେରା ଦୁଇ ଜଣ ସୁନା ଭର୍ତ୍ତି ବ୍ୟାଗ୍ ନେଇ ଘଟଣାସ୍ଥଳରୁ ଛୁ ମାରୁଛନ୍ତି । ଲୁଟ୍ ଅଳଙ୍କାରର ମୂଲ୍ୟ ପ୍ରାୟ ଦେଢ ଲକ୍ଷ ଟଙ୍କା ହେବ । ଏନେଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି ପୋଲିସ ।
