[ad_1]
ଦେବଗଡ/ଭୁବନେଶ୍ୱର: ଆପଣ ଦେଖିନଥିବେ ଏମିତିକା ସ୍କୁଲ | ଚକାଚକ ରଙ୍ଗ ଲାଗିନାହିଁ କି ଭଲ ବେଞ୍ଚ କି ଟେବୁଲ ନାହିଁ | କିନ୍ତୁ ଅଛି ଏମିତି ଏକ କ୍ଷମତା ଯାହାକି ଜଣେ ଭଲ ମଣିଷ ତିଆରି ପାଇଁ ଯଥେଷ୍ଟ | କୌଣସି ବଡ ସହରରେ ନାହିଁ କି ବଡବଡିଆଙ୍କ ଛୁଆ ଯାଆନ୍ତି ନାହିଁ ଏହି ସ୍କୁଲ | କିନ୍ତୁ ଏହି ସ୍କୁଲରେ ପାଠ ପଢ଼ାନ୍ତି ଦେଶବିଦେଶରେ ରହୁଥିବା ଅନେକ ପ୍ରତିଷ୍ଠିତ ବ୍ୟକ୍ତିତ୍ୱ | ସଫଳତାର ଶିଖରକୁ ଛୁଇଁଥିବା ମଣିଷମାନେ ଏଠାକାର ପିଲାମାନଙ୍କୁ ପାଠ ପଢ଼ାନ୍ତି | ଆର୍ଥିକ ସ୍ତରରେ ଦୁର୍ବଳ ଯୋଗୁଁ ଇଚ୍ଛା ଥାଇ ବି ନିଜ ପିଲାମାନଙ୍କୁ ପାଠ ପଢାଇ ପାରୁନଥିବା ଅଭିଭାବକଙ୍କ ପାଇଁ ଏବେ ଆଶାର ନୂଆ ଆଲୋକ ସାଜିଛି ଏହି ସ୍କୁଲ | ଏତେ କଥା ପଢି ଆପଣ ଭାବୁଥିବେ ଯେ ଏମିତି ସ୍କୁଲ କେଉଁଠି ଅଛି | ବାସ୍ତବରେ ଏହି ସ୍କୁଲ ଆମ ଓଡ଼ିଶାରେ ହିଁ ଅଛି |
Sambad is now on WhatsApp
Join and get latest news updates delivered to you via WhatsApp
ଦେବଗଡ ଜିଲ୍ଲା ତିଳେଇବଣି ବ୍ଲକର ଗାଁ ଝରାଗୋଗୁଆରେ ସାମାଜିକ ସଂସ୍ଥା ଏକ ଆଶା ପକ୍ଷରୁ ଖୋଲାଯାଇଛି ଏମିତି ଏକ ସ୍କୁଲ | ‘ଏକ ଆଶା ବିଦ୍ୟା ବନମ’ ନାମରେ ନାମିତ ଏହି ସ୍କୁଲ ବାବଦରେ ଜାଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ | କାରଣ ଏହାର ପାଠ୍ୟକ୍ରମର ଢାଞ୍ଚା ସମ୍ପୂର୍ଣ୍ଣ ନିଆରା | ସକାଳେ କିଛି ଶିକ୍ଷକ ଶିକ୍ଷୟତ୍ରୀ ପିଲାମାନଙ୍କୁ ପାଠ ପଢାଉଥିବାବେଳେ ସନ୍ଧ୍ୟାରେ ପିଲାମାନଙ୍କୁ ଚିନ୍ତନ କ୍ଲାସ(ଥିଁକିଙ୍ଗ କ୍ଲାସ) ମାଧ୍ୟମରେ ବିଭିନ୍ନ ପ୍ରସଙ୍ଗରେ ଶିକ୍ଷା ଦିଅନ୍ତି ଦେଶବିଦେଶରେ ରହୁଥିବା ପ୍ରବାସୀ ଓଡିଆମାନେ | ଡାକ୍ତର, ଇଂଜିନିୟରଙ୍କ ସହ ସଫ୍ଟୱେୟାର ବିଶେଷଜ୍ଞମାନେ ଅନଲାଇନରେ ପିଲାମାନଙ୍କୁ ଶିଖାନ୍ତି ଜୀବନରେ ସଫଳତା ପାଇବାର ମନ୍ତ୍ର | ୭୦ ପ୍ରତିଶତରୁ ଅଧିକ ଦାରିଦ୍ର୍ୟ ଥିବା ଗ୍ରାମକୁ ଲକ୍ଷ୍ୟରେ ରଖି ଏହି ବିଦ୍ୟାଳୟ ନିର୍ମାଣ କରାଯାଇଛି |
ଚିନ୍ତନଶୀଳ, ଦକ୍ଷତାସମ୍ପନ୍ନ, ଦୟାଶୀଳ ମଣିଷ ଗଠନର ଲକ୍ଷ୍ୟରେ ଏହି ବିଦ୍ୟାଳୟ ନିର୍ମାଣ କରାଯାଇଛି | ମାର୍କ ହିଁ ସବୁକିଛି ନୁହେଁ ଜଣେ ଶିଶୁ କେମିତି ଭଲ ମଣିଷ ହେବ ଓ ସମାଜକୁ ବାନ୍ଧି ରଖିବା ପାଇଁ ସାରଥୀ ସାଜିବ ସେଥିପାଇଁ ଆମେ ଏହି ବିଦ୍ୟାଳୟର ପରିକଳ୍ପନା କରିଥିଲୁ | ଦାମୀ ସ୍କୁଲର ପିଲାମାନେ ଯେଭଳି ଶିକ୍ଷା ପାଇପାରୁଛନ୍ତି ସେଭଳି ପାଠପଢା ଅନୁନ୍ନତ ଗ୍ରାମର ପିଲା ବି ପାଆନ୍ତୁ, ତାହା ହିଁ ଆମର ଲକ୍ଷ୍ୟ |
ସମ୍ବିତ ଦାସ, ପ୍ରତିଷ୍ଠାତା, ଏକ ଆଶା ଫାଉଣ୍ଡେସନ
ଦେବଗଡ ବ୍ୟତୀତ କେଉଁଝର ଓ ରାୟଗଡା ଜିଲ୍ଲାରେ ବି ଫାଉଣ୍ଡେସନ ପକ୍ଷରୁ ଚିନ୍ତନ କ୍ଲାସ ଖୋଲାଯାଇଛି | ପାଖାପାଖି ୩୦୦ ଜଣ ଛାତ୍ରଛାତ୍ରୀ ଏଠାରେ ପାଠ ପଢୁଛନ୍ତି | ଏବେ ଦେବଗଡ ଜିଲ୍ଲାରେ ଖୋଲାଯାଇଥିବା ସ୍କୁଲରେ ପ୍ରଥମରୁ ତୃତୀୟ ଶ୍ରେଣୀ ଯାଏଁ ଥିବାବେଳେ ଆଗକୁ ଶ୍ରେଣୀ ସଂଖ୍ୟା ବଢିବ | ପ୍ରବାସୀ ଓଡ଼ିଆମାନଙ୍କର ସହଯୋଗରେ ଏହି ବିଦ୍ୟାଳୟ ଖୋଲାଯାଇଥିବାବେଳେ ଚିନ୍ତନ କ୍ଲାସର ପରିକଳ୍ପନା ଅନୁଯାୟୀ ଯେଉଁମାନେ ଅନ୍ୟ ସ୍କୁଲରେ ପାଠ ପଢୁଛନ୍ତି ସେମାନେ ସନ୍ଧ୍ୟାବେଳେ ଏଠାରେ ଯୋଗ ଦେଉଛନ୍ତି |
[ad_2]
