[ad_1]
ଚନ୍ଦ୍ରଶେଖରପୁର: ବିଳମ୍ବିତ ରାତିରେ ରାସ୍ତାରେ ମାରପିଟ କରୁଥିବା ଅଭିଯୋଗରେ ଚନ୍ଦ୍ରଶେଖରପୁର ଥାନା ପୁଲିସ ୮ ରୋଡ୍ ରୋମିଓଙ୍କୁ ଗିରଫ କରିଛି। ସେମାନେ ହେଲେ କଟକ ସଦର ପ୍ରତାପନଗରୀର ପିଣ୍ଟୁ ଖଟୁଆ(୨୦), ସ୍ଥାନୀୟ ରଘୁନାଥପୁରର ପ୍ରକାଶ କୁମାର ବେହେରା(୨୬), କଟକ ଚାଉଳିଆଗଞ୍ଜର ସତ୍ୟନାରାୟଣ ପାତ୍ର(୩୨), ଜଟଣୀର ଦେବାଶିଷ ରାଉତରାୟ(୨୭), ବାରଙ୍ଗର ଅଶୋକ କୁମାର ସାହୁ(୨୯), ପାହାଳର ହରିଶ୍ଚନ୍ଦ୍ର ପୃଷ୍ଟି(୨୬), ପୁରୀର ପ୍ରଶାନ୍ତ ସାମଲ(୨୦) ଓ ପୁରୁଣା ଭୁବନେଶ୍ବରର ସଞ୍ଜୟ ମାଝୀ(୩୮)। ଗତକାଲି ରାତିରେ ଅଭିଯୁକ୍ତମାନେ ବିଶ୍ବ କଲ୍ୟାଣ ନନ୍ଦଙ୍କୁ ମାଡ଼ ମାରିଥିବା ଅଭିଯୋଗ ହୋଇଥିଲା। ପୁଲିସ ସୂଚନାନୁସାରେ ଗତକାଲି ରାତିରେ ଅଭିଯୋଗକାରୀ ବିଶ୍ବ କଲ୍ୟାଣ ଓ ତାଙ୍କ ବନ୍ଧୁମାନେ ଏକ କ୍ଲବ୍ରେ ପାର୍ଟି କରି ଫେରୁଥିଲେ। ଅଭିଯୁକ୍ତମାନେ ମଧ୍ୟ ସେହି କ୍ଲବ୍ରେ ପାର୍ଟି କରୁଥିଲେ। କିନ୍ତୁ ଅଭିଯୁକ୍ତମାନେ ପୂର୍ବରୁ ପାର୍ଟି ସାରି କ୍ଲବ୍ ବାହାରେ ମସ୍ତି କରୁଥିଲେ। ବିଶ୍ବକଲ୍ୟାଣ ଓ ତାଙ୍କ ସାଙ୍ଗମାନଙ୍କୁ ସେମାନେ ବିନା କାରଣରେ ଅସଭ୍ୟ ଭାଷାରେ ଗାଳିଗୁଲଜ କରିଥିଲେ। ପ୍ରତିବାଦ କରିବାରୁ ଅଭିଯୁକ୍ତମାନେ ବିଶ୍ବକଲ୍ୟାଣଙ୍କୁ ସଂଘବଦ୍ଧ ଆକ୍ରମଣ କରିଥିଲେ। ସୂଚନା ପାଇ ଚନ୍ଦ୍ରଶେଖରପୁର ପିସିଆର୍ ଘଟଣାସ୍ଥଳରେ ପହଞ୍ଚିଥିଲା ଏବଂ ଅଭିଯୁକ୍ତମାନଙ୍କୁ କାବୁ କରିଥିଲା। ପୁଲିସ୍ କହିବା ଅନୁଯାୟୀ ଅଭିଯୁକ୍ତମାନେ ନାଇଟ୍ କ୍ଲବ୍ରେ ପାର୍ଟି କରି ଫେରିବା ପରେ ଭୋର୍ ପର୍ଯ୍ୟନ୍ତ ବିଭିନ୍ନ ସ୍ଥାନରେ ଖଟି ମସ୍ତି କରିବା ସହ ଲୋକଙ୍କୁ ମାରପିଟ କରନ୍ତି।
[ad_2]
