[ad_1]
ନୂଆଦିଲ୍ଲୀ: ପୁଣି ଦିଲ୍ଲୀରେ ଘଟିଲା ହୃଦୟ ଥରା ଘଟଣା। ଯୁବକଙ୍କୁ ରାସ୍ତାରେ ୨୦୦ମିଟର ଘୋଷାଡି ନେଲା କାର୍। ଏହି ଘଟଣାରେ ଯୁବକଙ୍କ ମୃତ୍ୟୁ ହୋଇଥିବା ବେଳେ ଚୋରି ରୋକିବାକୁ ଉଦ୍ୟମ କରୁଥିବା ସମୟରେ ଏଭଳି ଘଟଣା ଘଟିଥିବା କୁହାଯାଉଛି। ଦିଲ୍ଲୀର ବସନ୍ତ କୁଞ୍ଜ ଅଞ୍ଚଳରେ ଏହି ହୃଦୟ ବିଦାରକ ଘଟଣା ଘଟିଛି। ଜଣେ ଟ୍ୟାକ୍ସି ଡ୍ରାଇଭରକୁ ପ୍ରାୟ ୨୦୦ମିଟର ପର୍ଯ୍ୟନ୍ତ ଟାଣି ନିଆଯିବାରୁ ତାଙ୍କର ମୃତ୍ୟୁ ହୋଇଛି। ଗତକାଲି ରାତି ପ୍ରାୟ ୧୧.୩୦ସମୟରେ ପୁଲିସ ଏହି ଘଟଣା ସମ୍ପର୍କରେ ସୂଚନା ପାଇଥିଲା। ସୂଚନା ପାଇ ପୁଲିସ ଘଟଣାସ୍ଥଳରେ ପହଞ୍ଚିବା ପରେ ଡ୍ରାଇଭରଙ୍କ ମୃତ୍ୟୁ ହୋଇସାରିଥିଲା। ମୃତକଙ୍କ ନାମ ବିଜେନ୍ଦ୍ର ବୋଲି ଚିହ୍ନଟ କରାଯାଇଛି।
ପ୍ରାଥମିକ ତଦନ୍ତରୁ ପୁଲିସ ଜାଣିବାକୁ ପାଇଛି ଯେ, ବିଜେନ୍ଦ୍ରଙ୍କ ଟ୍ୟାକ୍ସିକୁ କିଛି ଦୁର୍ବୃତ୍ତ ଚୋରି କରିବାକୁ ଆସିଥିଲେ। ଚୋରିକୁ ବିଜେନ୍ଦ୍ର ବିରୋଧ କରୁଥିବା ବେଳେ ଗାଡ଼ି ଷ୍ଟାଟ କରି ଚାଲି ଯାଇଥିଲେ ଅଭିଯୁକ୍ତ। ଏହି ସମୟରେ ବିଜେନ୍ଦ୍ର ତଳେ ପଡ଼ିଯିବା ସହ କାରର ତଳ ଭାଗରେ ଲାଖି ଯାଇଥିଲେ। ଅଭିଯୁକ୍ତମାନେ ଧରାପଡ଼ିବା ଡରରେ ଗାଡ଼ି ନଅଟକାଇ ଦ୍ରୁତ ଗତିରେ ଆଗକୁ ବଢ଼ିଥିଲେ। ଏହି ସମୟରେ ଗାଡ଼ି ତଳେ ଲାଖିଥିବା ବିଜେନ୍ଦ୍ରଙ୍କର ରାସ୍ତାରେ ଘୋଷାଡି ହୋଇ ମୃତ୍ୟୁ ହୋଇଥିଲା। ପ୍ରାୟ ୨୦୦ ମିଟର ପରେ ବିଜେନ୍ଦ୍ରଙ୍କ ମୃତ୍ୟୁ ହେବାରୁ ତାଙ୍କ ମୃତଦେହ ତଳକୁ ଖସିପଡ଼ିଥିଲା। ରାସ୍ତାରେ ମୃତଦେହ ପଡ଼ିଥିବା ଦେଖି ପୁଲିସକୁ ଖବର ଦେଇଥିଲେ ଲୋକେ। ଏବେ ପୁଲିସ ସିସିଟିଭି ଯାଞ୍ଚ କରି ଅଭିଯୁକ୍ତଙ୍କ ନିକଟରେ ପହଞ୍ଚିବାକୁ ଚେଷ୍ଟା କରୁଛି।
[ad_2]
