ପୁଷ୍ପା ୨’ ଅଭିନେତା ଅଲୁ ଅର୍ଜୁନ ଗିରଫ ହେବା ପରେ ତାଙ୍କର କୋଟି କୋଟି ଫ୍ୟାନଙ୍କୁ ବଡ଼ ଆଘାତ ଲାଗିଛି । ଡିସେମ୍ବର ୪ ଦଳାଚକଟା ମାମଲାରେ ପୋଲିସ ତାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ୪ ତାରିଖ ରାତିରେ ଯେବେ ପୁଷ୍ପା ୨ର ପ୍ରଥମ ଶୋ’ ହାଇଦ୍ରାବାଦର ସନ୍ଧ୍ୟା ଥିଏଟରରେ ପ୍ରଦର୍ଶନ ହେବାର ଥିଲା, ସେତିକି ବେଳେ ଦଳାଚକଟା ହୋଇଥିଲା ଏବଂ ଏଥିରେ ଜଣେ ୩୫ ବର୍ଷୀୟା ମହିଳାଙ୍କ ଜୀବନ ଚାଲିଯାଇଥିଲା ।
ଏହି ମାମଲାରେ ଆଜି ହାଇଦ୍ରାବାଦ ପୋଲିସ ଅଲୁ ଅର୍ଜୁନଙ୍କୁ ଗିରଫ କରିଛି । ଗିରଫଦାରୀ ବେଳର ଏକ ଭିଡିଓ ମଧ୍ୟ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି । ଏଥିରେ ଅଭିନେତା ‘ଫ୍ଲାୱାର ନୁହେଁ, ଫାୟାର’ ଲେଖା ହୋଇଥିବା ହୁଡିରେ ନଜର ଆସିଛନ୍ତି ।
ହାତରେ ତାଙ୍କର ଚା’ କପ୍ ରହିଛି । ଅଲୁ ଅର୍ଜୁନ ଯେଉଁଭଳି ଭାବେ କୁଲ୍ ଅନ୍ଦାଜରେ ଠିଆ ହୋଇଛନ୍ତି, ତାହା ଭାଇରାଲ ହେଉଛି । ଫ୍ୟାନ୍ସ କହିଛନ୍ତି ଯେ ‘ଏ ହେଉଛନ୍ତି ଅସଲି ପୁଷ୍ପାରାଜ’ । ଗିରଫଦାରୀ ବେଳେ ଅଲୁ ଅର୍ଜୁନଙ୍କ ପତ୍ନୀ ବହୁତ ଚିନ୍ତିତ ଥିବାର ନଜର ଆସିଛନ୍ତି । ଏହି ସମୟରେ ଅଭିନେତା ତାଙ୍କୁ କିସ୍ କରି ବୁଝାଉଛନ୍ତି । ଏହାପରେ ହସ ହସ ମୁହଁରେ ସେ ପୋଲିସ ସହ ବାହାରି ଯାଉଥିବାର ଦେଖାଯାଉଛି ।
ଅଲୁ ଅର୍ଜୁନଙ୍କୁ ପୋଲିସ ନେଇଯିବା ପରେ ପତ୍ନୀ ଇମୋସନାଲ୍ ନଜର ଆସିଥିଲେ । ଭିଡିଓଟି ସମସ୍ତଙ୍କୁ ଇମୋସନାଲ୍ କରିଦେଇଛି । କହି ରଖୁଛୁ ଯେ ଏହି ଦୁର୍ଘଟଣା ବିଷୟରେ ଖବର ପାଇବା ପରେ ଅଲୁ ଅର୍ଜୁନ ପୀଡ଼ିତା ପରିବାରକୁ ୨୫ ଲକ୍ଷ ଟଙ୍କା କ୍ଷତିପୂରଣ ଦେବାକୁ ଘୋଷଣା କରିଥିଲେ ।
ହାଇଦ୍ରାବାଦରେ ‘ପୁଷ୍ପା ୨’ର ପ୍ରିମିୟର ଶୋ’ ବେଳେ ସନ୍ଧ୍ୟା ସିନେମା ହଲରେ ଦଳାଚକଟା ହୋଇଥିଲା । ଏହି ଦଳାଚକଟାରେ ଜଣେ ମହିଳାଙ୍କ ମୃତ୍ୟୁ ହୋଇଥିବା ବେଳେ ବହୁ ଦର୍ଶକ ଆହତ ହୋଇଥିଲେ । ତେବେ ଅଲୁ ଅର୍ଜୁନ ପୂର୍ବ ସୂଚନା ନ ଦେଇ ହଲରେ ପହଞ୍ଚିଯିବାରୁ ଏଭଳି ଦଳାଚକଟା ହୋଇଥିବା ହାଇଦ୍ରାବାଦ ପୋଲିସ ପକ୍ଷରୁ କୁହାଯାଇଛି ।
